D’Burg Antimachia ligt a nere strategische Lag mit Blick uf de Seeweg zwüsche Kos und Nisyros. I Dokument us dr Zyt vo de Johanniter wird si unter de Name «de Landemachi» und «Lindemachii» erwähnt, während Reisendi im 18. Jahrhundert si «Andimesia» gnennt hend. Ihri grossi Usdehnig und d’Überrest vo zahlreiche Gebäude im Innere zeiged, dass si e befestigti Siedlig gsi isch. D’Burg isch über verschideni Epoche, vo dr Zyt vo de Johanniter bis zur osmanische Herrschaft, baut und verstärkt worde. Si umfasst e Flächi vo 26’250 Quadratmeter und d’Mure hend e Umfang vo 970 Meter. Zu de wichtige Verteidigungsanlage ghöred Kanonenöffnige, Pechnase und e halbkreisförmigi Bastion us em 16. Jahrhundert. Innerhalb vo dr Festig befinded sich d’Chile vo Agia Paraskevi und Agios Nikolaos sowie e grossi unterirdischi Zisterne. Di erscht schriftlich Erwähnig vo dr Burg stammt us em Jahr 1358, und laut Quelle isch si unter em Grossmeister H. de Villeneuve erbaut worde. Im Jahr 1457 het si ere grosse Belagerig vo dr türkische Flotte widerstande, wo 23 Täg dauert het, und het Tusigi vo Einwohner vo Kos beschützt. Biim grosse Erdbebe vo 1493 isch d’Burg schwer beschädigt worde und nachher vo de Johanniter repariert, verstärkt und wahrschinlich erweitert worde.

http://odysseus.culture.gr Συντάκτης Δ. Μποσνάκης, Αρχαιολόγος, Ε. Σκέρλου, Αρχαιολόγος